السبت، 26 سبتمبر 2009

على أنغام التجربة الأولى

صراحة البوست دا انا كنت عايز أسميه إسم تانى
كنت هسميه (( حبيتك من زمان من قبل حتى ما أعرفك ))
وعالعموم المكتوب دلوقتى (( التجربة الأولى )) هوا مقطع من نفس الأغنيه لأغنيه تحمل نفس الإسم
المهم احنا هنتكلم فى إيه
عن التجربة الأولى
مش لازم التجربة الأولى هى إنك أول مرة تحب أو تتعلق بحد
التجربة الأولى بالنسبة لى ومن وجهة نظرى فى كل مرة هى أول تجربة
إحساسك بالحب فى كل مرة تجاه شخص معين أو إنسانة معينه إنته حاسسها أوى
هوا دا بالنسبة لى فى كل مرة هوا التجربة الأولى
يعنى كل مرة بتحب فيها بتحس إنها أول مرة
ومحدش يسألنى ليه وإزاى واللى فات نسيته ليه وإيه الغدر اللى إنته فيه دا
طبعا اللى بتكلم فيه دا لسببب بسيط جدا
وهوا حالة شديدة من الوحدة مينفعش تدخل حد حياتكأو تحكى له مبادئك أفكارك
وعشان كدا عملت المدونة دى عشان أخرج من الحالة دى اللى بيفرضها عليه شغلى وهواياتى عالنت
مهما كان حواليك صحاب أو أهل فإنته برده لوحدك
(( مكنتش أعرف من الأول إنك مش بتحبينى ..كنت بحاول أقرب المسافة بينك وبينى ...حبيتك من زمان من قبل حتى ما أعرفك ...من بين كل البنات كنت دايما بستلطفك ))
وعلى ذلك فالواحد مر بمراحل كتير جدا وشاف كتير ودخل تجارب كتير لدرجة انه كل مرة بيخاف يقول على دى التجربه الأولى
لكن هحاول أفتكر وأنا بتكلم معاكم
يعنى مثلا تفرض عليك حالة الوحدة صديق واحد فقط
قد يكون أخ أو أخت
هوا عايش ومنطلق وإنته لوحدك
فكل شوية يحكى لك عن صداقاته وصحابه وعن الحياة اللى هوا عايشها
فتبتدى إنته تسمع غصب عنك
وبعدين تبقى مدمن ومتابع للحكايات دى
وبعدين تركز مع واحدة معينه على طول بيجيب سيرتها عالهامش
تبتدى تسأله
وتستفسر
لحد ما هوا يبلغك إن الشخصية دى هوا شاف حقيقتها
تبتدى إنته من غير أى شىء إنبهارك يروح
وتبتدى تعرف حقيقة الشخص من غير ما تشوفه
لإحساسك إنك قابلت غيره قبل كدا
حتى وإن قابلته هيكون زى ما إنته شايفه من وجهة نظرك ( ملحوظة صغيرة : الموقف دا حصلى كتير أوى )

وهكذا تستمر الدوامة
تفرض عليك حالة الوحدة نوع معين من الصداقات أو علاقات الإنترنت من الصداقات الإيميل
لكن النوع اللى انا بتكلم عنه هوا علاقات البيزنس والشغل اللى بتتقلب لصداقات
لأنى صراحة واقع فى الموضوع دا جامد جدا
يعنى بعد سنة ونص من الصداقة والتفاهم والوقوف جمب الصديق والحب والإحترام للصديق دا
والإهتمام والرعايه ليه ولحياته وشغله ومصالحه وكل حاجة
يعنى إنته مش مقصر
فجأة تحس إنك فى يوم من الأيام معرفتوش
فجأة تكتشف إن علاقة الصداقة الجميلة
تنتهى بظهور مبدأ

(( المصلحة فوق الذات ))
فجأة تكتشف إن علاقة الحب الجميلة اللى كانت بينك وبينها
كانت لأنه مكانش فى غيرك أو هى مش قادر تقرب من حد تانى غيرك
فعشان كدا وافقت وأقنعت نفسها بحبك
((قلت أراجع نفسى جايز اخرج من أوهامى جايز أفهم إن دا مكانش حلم من أحلامى ... كانت صدمة عنيفه صدمة كسرت ضلوعى إزاى أبان قدامها جامد وأنا غرقان فى دموعى ))
فجأة تلاقى إن فى ناس تانية كانت تستاهل منك الإهتمام دا وإنته رميتهم أو تجاهلتهم
كم من صديق كان فى حياتك ومش إهتميت بيه لحد ما بعد
فجاة تفتكر إزاى كان فى حب حقيقى بجد فى حياتك ومش لأن إنته مقدرتش تتمسك بيه
بالرغم من إن الكل قال إنك مقصرتش وإنك عملت المستحيل
بس فى الآخر إنته لازم تحس إنك قصرت
حتى أما فارقتها وبعدت تماما
عرفت إنها بتحبك وموافقة عليك
بس فى الوقت الضايع
عامل زى ماتش وفيه لاعب كورة واقف قدام الجون
بس بعد المباراة
حتى لو جاب جون مش هيتحسب
خلاص تحس إنها راحت
وتعرف إن بسبب عنادها مش بسبب إنك قصرت
وتلوم نفسك برده إنك مش عرفت تقنعها فى فترة خطيرة من حياتها وحياتك
تبدأ الأسئلة التقليدية
اتصلت بيها تمان ساعات فى مرة بتقنعها
بس مش عرفت تقنعها
يبقى إيه الفايدة
يبقى منجحتش
(( كانت أول مرة فى حياتى أغلط فى قرايه إنسان ..أحلام كانت شدانى ...أوهام كانت وخدانى محسسانى بالحياة اللى رجعت أعيشها من تانى ...امممم .... لاء مش ندمان بس محتاج مهلة للنسيان ))

تبتدى تسترجع ذكرياتك وتفكر فى اللى فات
تحاول تفتكر لحظات حزينة وتبكى
بس مش بتعرف
تتمنى اللحظات دى تتعاد تانى بكل ألمها وقسوتها يمكن تعرف تبكى بجد وتغسل روحك وتطهر نفسك من ذنوب كتير أوى محدش شايفها غيرك
تحاول تكتب لحد متعرفوش
تحاول تكلم حد متعرفوش
أنا بعمل كدا
طب ليه ؟؟؟
عشان مفيش حد تعرفه تعرف تكلمه وتحكى له بصراحة
تقعد مع ناس وتبتدى تتوه وتفكر وتروح وتيجى فى أفكارك
وتكتشف فى النهاية إنك طفل صغير من جواك
وإن حقيقتك كدا
تحاول تفكر اكتر
وتتعب نفسك وتدور
تفكر فى السفر
تجرب تسافر
ولو حتى لمكان متعرفوش ولا عمرك رحته وتقابل حد علاقتك بيه مش قوية او حتى تعتبر هامشية
وتعتبر الطريق والمكان اللى بتروحه مقبرة بتسيب فيها أى حاجة تؤلمك وترجع تانى
مفيش سبيل للسفر
تفكر فى حاجة أكبر
تبتدى تنزل شوارع القاهرة وتلف وتدور فى كل مكان وتدخل شوارع إنته عمرك ما دخلتها وتشوف أماكن مكنتش تتصور إنك ممكن توصلها
تحاول بأى شكل ترضى شغفك للإكتشاف وفى نفس الوقت تتعب نفسك على قد ما تقدر بحيث إنك تحاول تقف عن التفكير
يعنى خلاص الشغل مبقاش بيتعب زى زمان
يبقى لازم فى حاجة تانية تتعب وتهد الحيل
وتخلى مخك مش قادر على التفكير فى أى حاجة ولا حتى النوم
تبتدى وإنته ماشى تفكر فى حاجات أتفه من إنك تفكر فيها
تفكر فى بسكلته أو صفارة أو حتى ماوس قديمة أو لعبة كنت بتلعبها زمان أو حتى صوباعك اللى اتعور وانته بتلعب فى الشارع زمان
أو حتى تفتكر موقف حصلك من 15 او 18 سنة وانته صغير
وتفتكره بكل تفاصيله
تبتدى تحس بمتعه رهيبة
تبتدى تحس بحاجات مكنتش بتحسها قبل كدا
تعرف إن خبرتك أكبر فى الحياة
ترجع تانى تقعد عالنت
تكتب تدوينة
تسرح بخيالك تكتب إيه
تسيب الجهاز وتسيب كل حاجة وتقوم تحاول تدفن كل أفكارك فى مكان تانى
متقدرش
ترجع تلف على مدونات الآخرين
تستغرب كل الكمية دى من الرومانسية أو التقرب إلى الله أو الروقان اللى فى المقالات
تبهرك الصور
تاخدك الكلمات
فجاة تفوق وترجع مكانك عالكرسى الكبير
تبتدى تفكر تخرج تانى تروح فين
تنزل تقعد على اى كافيه لأى سبب كان
تنزل عالكافية
تقعد تريح أعصابك
مش عارف
ترفع سماعة الموبايل
تحاول تتصل بحد
وتلاقى إن مفيش حد تتصل بيه
أو إن أى حد بيرد بيكون رده عبارة عن كلمتين
أهلا إيوه ؟؟؟
وكأنه سؤال صريح ... إنجز عايز إيه ؟؟
تصبر وتقفل وتهدى أعصابك
مش شرط تكلم حد بتحبه او حد تعرفه أصلا كلم حد مش تعرفه
جربت اكتر من مرة ارقام تعرفها وانته متعرفهاش
فعلا صدق اللى قال الفراغ قتل صاحبه
وإزاى يكون فى معنى للفراغ فى حياة مليانه إلتزامات وشغل وبزنس وعلاقات ومدونات وصداقات عالنت
مش عارف
بس بيكون فى فراغ
(( ليه يا حبيبتى ما بينا دايما بحور ..أعدى بحر ألاقى غيره إتحفر ))..صلاح جاهين
(( ونصيحة لأى شاب غيرى مر بتجربه ... اللى تحبك بجد بجد إوعى تنفضلها .. لو بتحب واحدة غيرها ..إنته أصلك مش فى قلبها ... لما تشوف إزاى حب اللى بتحبك هتحبها ))
يمكن كل التعب دا مريت بيه وأنا بدور عليكى ؟؟
وأنا بشوفك فى عيون كل الناس وتطلع واحدة تانية مش إنتى ؟
لحد إمتى هفضل أدور عليكى ؟
وفى عيون أى حد بستلطفه فى البدايه
لحد إمتى هفضل تعبان وأنا بدور عليكى ...
مش هقولك غير حاجة واحدة .....
مهما تعبت وأنا بدور عليكى
هستنى أشوفك
هستنى نكون سوا
بحبك
(( سأظل أحبك وإن طال إنتظارى ,,, فإن لم تكونى قدرى ,,,, فقد كنتى إختيارى ))

إلى حبيبتى اللى لسه معرفهاش ولا عرفتها

ملحوظة : أنا مش عارف إيه اللى كتبته .
الكلمات باللون
الأزرق إقتباسات من أغانى مودى راب
الكلمات
باللون اللى مش عارف إسمه دا ... قريتها مرة عالنت
شاب فقرى
(( التجربة الأولى دى تجربة تحديد المصير ... هوصل للى أنا عايزه أو هتجنن من التفكير ))

هناك 45 تعليقًا:

بيطرية ومش بايدى يقول...

ياهوووووووووووووووووووووو
اول تحلييييييييييق


فوووووووووووووووووووووو

شاب فقرى يقول...

على فكرة يا دكترة

البوست بقاله 57 دقيقة :(

اتاخرتى جامد

كنتى فين دا كله

متقوليش بتقرى البوست :D

كل سنة وانتى طيبة

تانى تعليق

شاب فقرى

بيطرية ومش بايدى يقول...

والله وعملوها الرجالة

ايه ده يا ولاد
لا مش مصدق

يانهااااااااااااااااااار ابيض ولبن حليب وكوباية زبادى كمان

بيطرية ومش بايدى يقول...

لالالا انا الاول والتانى والتالت كمان

حد عنده اعترااااااض

اخر ديموقراطية اهو

بيطرية ومش بايدى يقول...

ماتحكبهاش يا شاب ده انا ماصدقت ان انا اول تعليق

كنت بلف شوية ف بقية المدونات

بيطرية ومش بايدى يقول...

اما ده بقى فالخامس عشان الحسد

خمسة وخميسة فى عنيكم
امشى ياد انت وهو هتطلعلك الخرزة الزرقا

بخرونا بخرونا
ياناس ياشر كفاية قر

شاب فقرى يقول...

ولا يهمك

اربع تعليقات مرة واحدة

ما شاء الله والله ينور

قريتى البوست ؟

نفسى حد يقولى معناه ايه لانى خايف اقراه

زى بالظبط الحلقة الاولى من السلسلة غير راضى عنها تماما

:((

بيطرية ومش بايدى يقول...

نروح نقراااا

ونرجع تااااااااااااانى

فاااااااااااصل
ثم نواااااااااااااااااصل

ابقوا معنا

شاب فقرى يقول...

لا اله الا الله

ايه يا دكتووووورة
امال لو قريتى البوست بقى

هيبقوا اتنين وتلاتين تعليق اكيد :)

الله ينور :)

بيطرية ومش بايدى يقول...

الله الله الله ايه هو انا مش قولتلك هاعمل معاك احلى واجب
ده انا كده احتلالى رحمة بالنوسبة لدموع القمر ولا ايناس الاحزان ولا عادل ولا بقى اما حد يبقى بيعلق مع التانى ده بيبقى حرب

شاب فقرى يقول...

ولا يهمك

المدونة مدونتك :)

ولو فى اى حد تانى ناوى ييجى يعلق

وماله

بس انا هسبق الكل :P

:)

منورررررررررة :$

بيطرية ومش بايدى يقول...

مين قالك ان البوست اللى فات مش حلو
بالعكس ده جميل جدا والله ومش بجامل
انا حسيت فيه بخنقتك وافتكرت مواقف حصلتلى بس طبعا اقل بكتير منك

لالا بس البوست ده انا تهت فيه شوية
بس فهمت قصدك ف الاخر

وعلى فكرة الكلام اللى مكتوب باللون اللى انت مش عارف اسمه ده
دى كانت رسالة موبايل

صعب اوى انك تبذل قصارى جهدك
ف ارضاء شخص كل همه مصلحته وبس
بيدور على نفسه وبس
انا مريت بالشخصيات دى كتييييير
ولسه اللى يعيش ياما يشوف

بس البوست حلو واحلى حاجة اما تحكى عن قصة حياتك لناس متعرفكش يعنى مش هتذلك ولا هتقولك فاكر اما قولتلى كذا وكذا
يااااااااااه المدونة دى جت رحمة لينا والله
ربنا يخلى عمو بلوجر

شاب فقرى يقول...

انا مكنتش بعمل كدا فى المدونات بس

انا زمان كنت بدون
قعدت تقريبا سنة ونص
من غير ما اكتب كتير
كل كام شهر كنت بكتب مرة

بس كان عندى طرق تانية لانى اكلم ناس معرفهاش زى الشات مثلا
ودى كانت اوحش طريقة
فى الفون او الاتوبيس
او انى انزل اقعد عالقهوة واتعرف على شلة كلهم يا
مش عايز اقولك كان عندى ميت منفذ وكلهم بييجوا بصعوبة
صعب انك تلاقى حد مستنى يسمعك بدل ما هوا مستنى دوره فى الكلام

نرجع لمرجوعنا
الكلام اللى مكتوب بالالوان
اغانى مودى راب
التجربة الأولى و اغنيه تانية من الالبوم الجديد

بجد نورتى المدونة

تحياتى واحتراماتى يا دكترة

شاب فقرى

بيطرية ومش بايدى يقول...

اى اى كابتن هو كله ضرب ضرب

خلاص حرمت هاقول حاجة اخيرة واطلع بره خالص

يارب يرزقك باللى تخلصك من فقرك ده يارب يرزقك بحبيبة تحبك من كل قلبها وعمرها ماتديك ظهرها وتصونك وتخلى ايامك كلها فرحة وبهجة وسلامة وسعادة وخير وامن وحب وحنان وطيبة وهنا و......و...... كمل انت بقى تعبت

اللهم آآآآآآآآآآآآآآمين

خلاص طالعة اهو من غير زق طيب

شاب فقرى يقول...

خليكى موجودة
انا هنا 24 ساعة يوميا

لو فضلتى تعلقى

هفضل ارد
بدل الفيلم اللى بشوفه للمرة التلاتة وتلاتين :$

:)

منورة المدونة

محدش عارف الرزق بييجى امتى

يمكن اللى بتحكى عنها تيجى لى فى عمر الخمسة وستين

:(

شفتى التشاؤل دا فى حد قبل كدا ؟

؟؟؟؟

بيطرية ومش بايدى يقول...

اه انا قبليك معلش بقى انا مدرسة ف التشاؤم بس مش ببينه لحد
انا مستنية بقى مشطوب الاسم ده كمان 60سنة يعنى يكون انا عندى كااااااااااااااااام؟؟؟؟؟؟؟؟؟؟
ياسيدى ادعى ربنا انت بس
واحنا نأمن وراك
وعلى الله التساهيل

شاب فقرى يقول...

200 سنة تقريبا

وماله

بالنسبة لى الحياة مبتقفش

مع انى لو ركزت شوية مش هلاقيها واقفة وبس

هلاقيها نايمة ورايحة فى النوم

يعنى مثلا بقول الجملة دى كتير
بس لما سافرت وخرجت من اللى انا فيه وبصيت لحياتى لقييت انها نايمة

لقيت الشغل مفيش فيه تقدم من مدة كبيرة
ولقيت انى مش برتاح وعلى طول عالنت
وان احلامى كل يوم بتزيد

وهكذا

دوامة من الانتظار

كان فى رباعية لصلاح جاهين بتتكلم عن الموضوع دا بس نسيتها

فاكراها
؟؟؟؟

بيطرية ومش بايدى يقول...

للاسف لا
الزوهيمر اشتغل عندى من زمااان
ياسيدى وماله اما تقف شوية تاخد ريست
وبعدين تكمل
لازم الموتور يستريح شوية
ولا ايه واما تنام برده مفيش مشاكل تاخد تعسيلة حلوة
بس اهم حاجة انها بتصحى تانى
وان شاء الله مش هتنام تانى
واحلامك هتقل عشان انت بتحقق جزء منها
خلى املك ف ربنا كبييييييييييير
يا رجل
عارف فيه اغنية اسمها يلا يا شباب
بتيجى على قناة فور شباب
الاغنية دى تحفة اول ما باسمعها بحس
انها بتعملى ريفرش كده واستعيد نشاطى تانى

شاب فقرى يقول...

انا مبطل اشوف التلفزيون تقريبا من اربع سنين
ومقاطع الاخبار العالمية والدولية والتحليلات السياسية

انا لو كنت كملت عالمسار اللى كنت ماشى عليه

كان زمانى بقيت وزير ولا حاجة

او عضو هام من اعضاء الحزب

بس الحمد لله كدا تمام

عشان كدا الاغنيه اللى قلتى عليها مش سمعتها ابدا بيتهيالى :$

عشان انا بشوف التلفزيون بالصدفة

لان النت عندى واكل وقت كبير اوى

انا عندى مبدأ ان مينفعش العجلة تقف او حاجة توقفنى من قبل ما احقق هدفى والا بالنسبة لى يعتبر فشل

انتى عندك نسبة امل رهيبة حاسس انها حقن فى التعليقات :$

وانا بخاف من الحقن يا دكترة

صحيح مقلتيش تشربى ايه ؟؟؟

:)

بيطرية ومش بايدى يقول...

فسفاسية لو سمحت وفى مج كمان

ياسيدى دى مش حقن ولا اسافين ولا حاجة
بس انا شايفة ومتاكده ان الدنيا دى ليها لون واحد وهو

البلالالالالالالاك
انا بقى بحاول وبمساعدة ربنا طبعا وسيدنا محمد بحاول اخلى
لونها ببيييييينكى
وبحاول ادى نفسى امل ف الحياة
شوف ان لسه يمكن ماطلعتش من البيضة اهو زى مابيقزلزا بس خدت كام قلم على قلم حمرلى قفاى
بس بارجع واقول لسه فيه خير وانا هاقوم تانى هو مين ده اللى يقدر يوقفنى مايمكن ربنا ماتبلى ان اقابل الشخصية ال... دى وتحاول انها تأثر فيا بالسلب
بس انا مش هاسكتلها وباقبل التحدى

بيطرية ومش بايدى يقول...

شكلنا كده بالمنظر ده هنوصل للتعليق30 باذن الله

قول يارب

شاب فقرى يقول...

ان هنا 24 ساعة

عاجبنى اوى محاولاتك لجعل الحياة بينك

بالرغم من ايمانك انها بلااااااااااااك

انا بقى مش عارف احاول اخليها ايه

لانى صراحة مش بفهم فى الالوان بشكل كافى

بعك كتير فيها

حتى اللون اللى كتبت بيه مش عارف اسمه

بحس بيهم بس

انا فى مرة نزلت قابلت شاب مصرى صديقى من بزنس فى النت
الواد دا كان عنده كمية فقر
مش عايز اقولك
كان لسه راجع من السعودية وكان شغال هناك نفس شغلى دا
وراجع بقى محسسنى ان الحياة مش بلاك وبس
بل العن من كدا الف مرة

كنت ماشى من هناك عايز اقلع اللى فى رجلى واضرب نفسى عشان روةحت له او شفته
بس مش بيأثر فيه برده

اللى فى دماغى فى دماغى

مشكلة خطيرة

صح ؟

شاب فقرى يقول...

لاء مش لدرجة التلاتين

بس لو عدينا الميه نبقى تمام اوى :D

الحياة حلوة

تشربى ايه

المدونة دى بيت الكرم كله

بيطرية ومش بايدى يقول...

ماشى على الرغم من ان الفسفاسية كان سكره قليل بس وماله نشرب
كركارية
وساااااااقع

ويارب نعدى الميه بس

شاب فقرى يقول...

كنت زمان بحب حاجة كدا اسمها تانج

واتعلمت الطريقة من شخصية ذكرتها فى البوست

للاسف التانج دا مش بيتعمل عادى كدا

دا محتاج طريقة وشغل عالى

عشان كدا اكتفيت من صنع المشروبات بالشاى لانى بشربه من زمان
والقهوة لانى ياما عملتها للوالد الله يرحمه
والتانج لانها علمتنى ازاى بيتعمل صح

لك ان تختارى

ها ؟؟؟

تانج برتقان بس

مفيش مانجه لان المانجه ف التانج وحش

رايك ايه ؟؟؟

بيطرية ومش بايدى يقول...

ربنا يعينك على دماغك
وافتكر اول ما تحس ان الفقر هيجيلك
افتكر ان انت ف ام الدنيا
هتضحك ع طووووووووووووول مش كده؟؟؟


والله انا حاسة ان دى مؤامرة

كلام ف سرك يعنى عشان ماينقبضش علينا
والله ومش كلام اهبل ولا حاجة

دى مؤامرة انهم يدمروا الشباب ويعقدوهم ف عيشتهم ويخليهم يتمنوا الموت
عشان يخلوا البلد خيخة واى كلام ومالهاش مستقبل
مع ان خيرها كتيير
بس انا عن نفسى مش هاديهم الفرصة
ومش هاستسلم


انت بقى هتستسلم؟؟؟؟

بيطرية ومش بايدى يقول...

ماشى ناخد قهوة
وساااااااااااااااادة كمان
عشان البلاك يكمل

شاب فقرى يقول...

فى قدامى كذا فكرة وطريقة للسفر وانى اسيب البلد
بل انى طلعت جوةاز سفر وتصريح سفر كمان من سنتين تقريبا

بس الحمد لله الرد الوحيد اللى كنت بقوله لحد اخر لحظة

انا قاعد فيها لحد ما تبقى نار وحريقة ورماد وتخرب عشان ابنيها تانى

انا مش هسيبها لانى من الاخر عايز اموت فيها وتحديدا فى بركة السبع
:$

بحبها اعمل ايه ؟؟؟

مش هستسلم طبعا

كنت هقولك على حاجات العن من كدا بس قلت خليها للبوست الجاى

اهوه الاقى حاجة احكى فيها

لاحسن الواحد اعصابه من ناحية الموضوع دا اللى هكتب فيه
بجد مش قادر
ببقى عايز اولع فى الدماغ اللى بتفكر فى كدا

:(

بيطرية ومش بايدى يقول...

لووووووووووووووووووولى
لا ده انا برغرط
هات شربات بقى بلا شاى بلا تانج
وسك على القهوة

بيطرية ومش بايدى يقول...

يلا الحمد لله فاضل تعليقين ونكمل 30 ابسط ياعم
عملنا شات جديد اهو
عبر البلوجر

شاب فقرى يقول...

عيونى

تطلبى حاجة تانية مع الشربات

لان ابو اشرف بتاع الشربات عنده مينمم شارج

ولازم تشترى حاجة كمان :D

عشان تمضى عالشيك وهوا مظبوط


:P

ها فكرتى ؟؟؟

بيطرية ومش بايدى يقول...

هاتلى على ذوقك
اصل انا معرفش ابو اشرف
بتعامل مع ام ابراهيم بس

شاب فقرى يقول...

انا عن نفسى هعمل بوستات مخصوصة للموضوع دا

وهمسح الهيستورى عشان محدش يتابع

او يمكن اعمل مدونة للمدعوين فقط

عشان اريح نفسى من جوجل ومحركات البحث والحاجات اللى بتخش بدون اذن

اهوه انا كان نفسى فى كدا او ل ما بدات تدوين
انى اجرب حاجة اسمها المراسلة البريديه

شاب فقرى اكتر منى قالى عليها

وقالى انها كانت مشهورة قوى قبل اختراع النت

مش عارف بقى الفكرة دى نافعة ولا مشس نافعة

انا لسه مستنى الصدى بتاعها :D

وياااااااااااااارب تنفع الفكرة دى

شاب فقرى يقول...

خلاص اجيبلك حاجة من عند ابن ام ابراهيم

احمد تلوث تقريبا
اسمه كدا :D

بيبيع زلابيا محترمة

او طعميه

او بليله

لانى كنت بحب البليلة دى وانا صغير

بس خلاص

الراجل بتاع العربية بطل يعملها وبطل ييجى :(

هبقى اشترى عربية لما اكبر واعملها بنفسى

ها تاكلى ايه جمب الشربات ؟

بيطرية ومش بايدى يقول...

يالهو اسود لا ياعم انا هاقوم يحسن نخش ف 40
والناس تخش يجيلها شلل وتنسى كانت هتكتب ايه

لا ياعم كفاية عليك كده يحسن انا رغاية
لوك لوك لوك
وانت عندك الضغط عالى

يلا سلام دلوقتى
ونبقى نرجع لمرجوعنا بعدين

شاب فقرى يقول...

نو بروبلم
تنورى فى اى وقت

ومرجوعنا موجود
ومش هيروح بعيد

نروتى المدونة وانا هضرب الشربات والاكل

:$

نصيبك بقى تقومى بدرى من غير ما تاخدى الواجب

كنت لسه هتكلم عن مخاوف البنى ادم فى الحياة
بس خلاص
خليها المرة الجايه

نورتى

شاب مش فقرى لمدة دقيقتين

شمس النهار يقول...

البوست ده جامد
وعلشان اقدر اعلق صح لازم اجي تاني اقراه تاني علي روقه علشان دلوقتي
خلاص الساعه تلاته وربع الصبح
ان شاء الله بكره علي رواقه نرجع ونرغي

كل سنه وانت طيب

شاب فقرى يقول...

شمس النهار

نو بروبلم

بانتظار تعليقك تنورى فى اى وقت

تحياتى

شاب فقرى

شمس النهار يقول...

جيت تالت اهو
مش ممكن انا قريته تلات مرات
الموضوع كبير جدا

صحيح انت عمال تصول وتجول وتطلع من حته تدخل التانيه وبعدين ترج لها تاني
بس واضح ان دي حالة من الخضه والتوهان

مع النفس بس هي صحيه جدا
علشان بيتبعها قرار او حاجه جديده بتحصل
فهم جديد لشئ قديم

كده يعني

بس الشاطر اللي يتغلب علي الوحده ومايخلهاش تطره يعمل حاجات ممكن تكون مش حلوه او مدروسه

زي كده الجار السو اللي بيتفرض عليك

(فجأة تكتشف إن علاقة الحب الجميلة اللى كانت بينك وبينها
كانت لأنه مكانش فى غيرك أو هى مش قادر تقرب من حد تانى غيرك
فعشان كدا وافقت وأقنعت نفسها بحبك )

(وساعات بيكون علشان تاخد حاجه الكل بيتسابق عليها وتثبت لنفسك انك انت اللي فزت بيها ولما تفوز بيها بسهوله ترميها)


بس ساعات كتير بتحصل والجرح فيها بيكون جامد جدا

بس ارجع واقول ان الحب الصح موجود مهما حصل هو موجود
بس المهم لما نقابله نحافظ عليه ونتمسك بيه
بس يكون صح مش مزيف


(( سأظل أحبك وإن طال إنتظارى ,,, فإن لم تكونى قدرى ,,,, فقد كنتى إختيارى ))

اما العباره دي فهي جميله جدا

بصراحه البوست جميل

وعايز بوست يترد عليه بيه مش تعليق

شاب فقرى يقول...

شمس النهار نورتى البوست

دى حياتى مش بوست وبس :$

نورتى بجد المدونة كلها

تحياتى واحتراماتى

شاب فقرى

мαησηα يقول...

اول مرة ازور مدونتك ومش هتكون الاخيرة باذن الله تعالى ..

لذيذة اوى المدونة ودماغك حلوة اوى

عجبنى البوست ده اوى وف واحد كمان هاعلقلك عليه بردو ..

رغم انه بوست طويل بس فهمت سبب التطويل لانك وحيد ومن غير اصحاب وبالتالى فانت منضم لزمرة المدونين او من يطلق عليهم مجانين النت وسط العيلة هههههههه

اول مرة اعرف مشاعر الشباب وايه بيدور جواهم وده كان عندى فضول فظيع اعرفه هل هما بيبقوا زينا محتارين وبيدوروا بردو فشكرا ليك ولو ان دى ممكن تكون مش مشاعر كل انواع الشباب

احلى حتة قلتها انت بقه بجد

الجزء ده

(( ونصيحة لأى شاب غيرى مر بتجربه ... اللى تحبك بجد بجد إوعى تنفضلها .. لو بتحب واحدة غيرها ..إنته أصلك مش فى قلبها ... لما تشوف إزاى حب اللى بتحبك هتحبها))

تعرف لو كل شاب ارتبط بواحدة هى بس بتحبه وفكر ف اللى قلته ده والله الحياة هتبقى فوللى بس للاسف اى شاب بيربطه القدر ببنت هو مبيحبهاش بيفضل يعاقبها هى كانها السبب ف فراقه عن حبيبته

سواء بمعاملة زى الزفت او بمعاملة فيها لامبالاه وبعتبرها بردو زى الزفت

ربنا يباركلك ويكتر من امثالك ويرزقك يارب بالزوجة الصالحة اللى تكون سبب ف دخولك الجنة .. وتسعدك وتهنيك قول امين ياراجل

اسعدنى مرورى عندك

هاروح اكمل تقليب ههههه

شاب فقرى يقول...

๓คภ๏ภค

صراحة الجزء المذكور مش من تأليفى

دى أغنيه راب

بس سعيد انى قدمت لك افكار كان نفسك تقريها

تحياتى

شاب فقرى

حبات التوت يقول...

ياااااااه

كل دة كلام بس كلام طالع من جوة جوة قلبك

لاتعليق

ومش تسئلنى اية اللى خلانى ارد على الموضوع دة مع انه قديم

شاب فقرى يقول...

wella


نورتى اولا

تعلقى فى المكان اللى يعجبك وبراحتك خالص :)


يارب تكونى بخير

دا كله واكتر من دا

بس الواحد مينفعش يوصل كل حاجة للناس

عشان مينفعش

:)

شاب فقرى

Sally Ahmed يقول...

:)))
عارفه فكرتنى بايه اغنيه انا زحمةوربكة وشغل جنان :D