الجمعة، 18 سبتمبر 2009

الحمد لله لسه فى أمل

فى أمل إنى أفرح العيد دا وعلى عكس كل عيد أو مناسبة أو عزومة
كل مرة بحس إنى إنى لوحدى
إنما السنة دى
الحمد لله كلكم موجودين :)
منورين ;)

والحمد لله بدأت أرتب حياتى بمناسبة العيد
أول حاجة

جبت الجردل( الهلال والنجمة وخلوا بالكوا من العلامة زى الصورة)
والقماشة وقماشة تانية ناشفة و(مأشة ) ومكنسة ولبسطت طقم محترم جدا
وقعدت أكنس وأمسح وأنضف أودتى
أصريت إنى اللى لازم أنضف أودتى
ومشيت كلامى على كل البيت ( مش راجل ولا إيه )
وإنتهت النضافة بعد تعب جامد جدا
والحمد لله كل اللى دخل الأودة إنبهر
طبعا لانهم لاقوها لاول مرة من سنين انى انا اللى انضفها وبالشكل الرهيب دا
والحمد لله بقى عندى حالة رهيبة من الرضا النفسى

تانى حاجة :
اليومين دول واحد صحبى وحبيبى أوى إمتحن CEH او Certified Ethical Hacker

ولمن لا يعلم فى شهادة كبيرة جدا فى السيكيورتى
ومعناها بالحرف . هاكر أخلاقى معتمد
بمعنى إنه يقدر يعمل attack على أى سيستم بسهولة وعلى أى سيرفر حتى وإن كان سيرفر وزارة الدفاع الامريكية
ونجح وعمل score عالى جدا
ودا شكل الشهادة من عالنت

واللى فرحنى أكتر إننا والحمد لله من غير أى كورسات بنقدر نذاكر الماتريال وننجح ونجيب سكور كمان
وإن فى أمل فى أمتنا وفى بكره
لان فى احصائية من الشركة المؤسسة للكورس والشهادة بتقول إن فى عدد كبير جدا من الدارسين والمهتمين بسكيورتى وحماية المعلومات فى إسرائيل ودى حاجة تحزنى وتحرق دمى لكن ننساها ونفرح يومين
وكمان إتفقنا انا وصديقى نذاكر سوا RHCE شهادة تانية مهمة جدا بالنسبة لى فى مجال عملنا فى ال it
ودا برده منظر الشهادة

ولمن لا يعلم فهى شهادة من شركة عالمية إسمها RedHat اللى بتصدر توزيعة لينوكس بنفس الاسم
واللينوكس هوا سيستم مهم وكبير وخطير وبيستخدم فى أكبر الشركات
وانا شغال بيه فى البيت :$
وإن شاء الله هنخلص المنهج بتاعها فى أقرب وقت لأننا ولله الحمد فاهمين فيها كويس أوى
يعنى فى خلال كام شهر هبقى مهندس معتمد من شركة ريدهات وهتبقى خطوة مهمة جدا فى طريقى

تالت حاجة :
جهزت نفسى لرحلة إستجمام هتستمر تلات أيام فى إسكندرية مع أصحابى
لأول مرة من فترة كبيرة جدا هبعد عن النت والكمبيوتر وأى حاجة فى حياتى وأستريح فترة كافية جدا
عشان أقدر أوصل للى انا عايزة

رابع حاجة :
المدونات والإنتاج الأدبى الرهيب اللى بقيت بشوفه كل يوم ( بالرغم من إنى رجعت للتدوين من مدة قليلة جدا )
ودا حاجة بتفرحنى وبتلمس مشاعرى
ومجرد متابعة التعليقات بتبسطنى دلوقتى

خامس حاجة :
عندى إحساس جميل أوى إن فى أكتر من سبب يخلينى سعيد

ونفتكر كلام عمنا صلاح جاهين

غمض عينيك وامشى بخفه ودلع
الدنيا هى الشابه وانت الجدع
تشوف رشاقة خطوتك تعبدك
وانت لو بصيت لرجليك تقع
وعجبى ...

تحياتى ..
شاب فقرى

ملحوظة خطيرة : ( حتى لو سافرت هتابع المدونة ..صحيح هبطل شغل عالنت لفترة لكن هتابع المدونة والمدونات كلها إن شاء الله )

هناك 17 تعليقًا:

غير معرف يقول...

اولا : كل سنة وانت طيب بمناسبة العيد :)

ثانيا : انا متهيألى ان احساس الواحد بالسعادة او الفرحة فى اى حاجة بيكون نابع من جواه
:)
يعنى هو لو قرر يكون سعيد هيبقى سعيد :)

ثالثا : ربنا يوفقك فى موضوع الشهادات والحاجات دى :)

رابعا : بمناسبة سعادتك بالانتاج الادبى فى المدونات .. فانا مبسوطة باللى شايفاه عندك :)

خامسا : تحية لاختيارك رباعية صلاح جاهين :)

سادسا : انا دورت على أمل طول البوست ملقتهاش :D

مش عيب تسيب البلوج لوحده وتروح تسحر هههههههه

تحياتى

اقصوصه يقول...

كل عام وانته بخير

اكيد تستحيل الحياه بدون امل

سعيده جدا بتعرفي على مدونتك

تمنياتي بقضاء اجازه سعيده

وبانتظارك دوما

شاب فقرى يقول...

غير معرف

لك منى كل التحية

هتكلم بطريقتك اللى هى طريقتى

أولا : وأنت طيب ( أو طيبة )

ثانيا : فعلا عندك حق فى الاحساس بالسعادة لان مش الظروف هى اللى بتقرر لكن طريقة معاملة الناس اللى حوالين البنى ادم هى اللى بتقرر
المعاملة والعامل النفسى

ثالثا : ان شاء الله نتوفق فى الشهادات دى وعقبالك

رابعا : كان نفسى ترد بمدونتك عشان أقدر أتابعك وأتابع الإنتاج الأدبى منك :)

خامسا : عفوا ... صلاح جاهين زى ما قلت عمنا كلنا
عم كل واحد بيحب مصر
عم كل واحد حساس وعنده قلب يحس بغيره
عم كل مؤلف أو كاتب خواطر أو كاتب زجل
عم كل فيلسوف ومفكر

سادسا : أمل واخده بلوك أو يمكن راحت تتسحر لو إنتظرت شوية هتلاقيها

الأمل إحساس زى السعادة بينبع من الإنسان ومن اللى حواليه وملوش أى علاقة بالظروف أو بالموضوع

رجعت بعد السحور وهنا على طول

لك منى كل التحية

شاب فقرى :$

شاب فقرى يقول...

أقاصيص
نورتى المدونة
وكل سنة وإنتى بألف خير وإلى الله أقرب
بحاول ألتمس الأمل من كل شىء ولو حتى من تعليقات الآخرين لأن طموحى كبير جدا ومش هقدر أعتمد على أى حد فى تحقيقه غير المولى تبارك وتعالى ونفسى
دعواتك لى بأن تكون اجزة ممتعة
وعقبال أجازتكم

تحياتى

شاب فقرى :)

ماء تشرين يقول...

كل سنه وانت طيب والف مبروك على الأوده بتاعتك بالنسبه للهكر والحجات دى احنا بردو مدونين زاى بعض ياعنى وسطه لو عايزين اى حاجه نكلمك ولا ايه ؟
واهلا بيك في اسكندريه اكيد هتنورنا

تقبل مرورى

شمس النهار يقول...

انا سعيده جدا اني اتعرفت علي مدونتك
بس ونبي ليه شاب فقري وانا شايفه انك ماشاء الله
غني جدا بالأفكار والعلم وخفة الدم


وليه سؤال
ليه الشباب بيحبوا يتعلموا موضوع الهكر ده
ياريت اعرف وهل كله شر والا في جانب خير

وبجد انبسط جدا انك عند وعي ونظفت غرفتك بهم وشجاعه

علشان في شباب عنده نسبة تخلف عنصري فاهم ان ده عيب وهينقص من رجولته مع ان الرجال بينجحوا في التنظيف اكتر من النساء لما للرجال من قوه بدنيه عن النساء لكن النساء افضل في اللمسات الاخيره والتفاصيل الدقيقه

يبقي كده في تكامل


ربنا يوفقك

وان شاء الله تنبسط في رحلتك
وترجع بالسلامه

وكل سنه وانت طيب وبخير وصحه وسعاده

fL0weR-giRL يقول...

السلام عليكم
*************

عيد سعيد ^_^

يوميات شاب فقري اسمها حلو عجبني جدا بس ليه كدا فقري مره واحده

ومبروك عليك نظافه غرفتك ^_^

زرباعيه صلاح جاهين حلوه حيل

ولازم يكون عندنا امل عشان نقدر نكمل حيتنا ....

تقبل مروري ** ^_^

بيطرية ومش بايدى يقول...

دايما باجاى ف الوقت بدل الضايع
كان نفسى اكون اول تعليق بس معلش خيرها فى غيرها
الف مليووووووووووووووووووووون مبرووووووووووووووك بمناسبة كل حاجة كتبتها حلوة وعارف السعادة اللى انتى حاسسها باينة جدا فى كتابتك حاسة انى كمان سعيدة يعنى ماشاء الله عليك وصلنا احساسك وخليتنا نحسه كمان
ربنا يبارك فيك
ويجعلك من عظماء الاسلام ويحميك انت وصحابك وتكونوا شباب جامدين اخر حاجة وتكونوا جروب شباب الاسلام



الحق انا هاقوم بسرعة دلوقتى عشان اقوم انظف اودتى انا كمان ياحسن بيشدوا فى شعرهم منى عشان قاعدة على المدونة
الحق اخر شعراية فى راسهم قبل ما يشدوها


سلام عليكم
وتقبل تحياتى

بيطرية ومش بايدى يقول...

اه وكل سنة وانت طيب يا جميل

وعيد سعيييييييييييييييييد
زيك كده بالظبط يارب يديمها عليك نعمة
يارب

شاب فقرى يقول...

ماء تشرين

نورتى المدونة

بالنسبة للهاكر لسه الطريق طويل جدااااااااا
بس طبعا تحت امركم فى اى حاجة
فى الحماية مش الهاكر :$

اسكندرية منورة بيكى وبأهلها :)

كل سنة وانتى طيبة

شاب فقرى يقول...

انا أسعد بتعرفك على المدونة
ونورتينا

بالنسبة لموضوع الهاكر والسيكيورتى
دا فرع فى عالم ال it
ومهم جدا وليه شغل فى كل مكان وفى كل شركة
احنا مش هندفع 350$ فى الامتحان عشان خاطر حاجة تافهة
انما دى احلامنا وجزء من حلمى هيكون فيه الموضوع دا سيكيورتى
يعنى الهدف من الشهادة ودراسة الكورس هوا ان الواحد يهاج السيستم بشكل شرعى ويكتشف الثغرات اللى فيه ويقفلها عشان تبقى المنظمة فى امان

اما تنضيف الاودة فدا شىء طبيعى من زمان
والحمد لله ان الواحد يبات فى مكان هوا اللى تعبان فيه بايده
شىء ممتع
وكل سنة وانتى طيبة ويارب دايما بخير

بالنسبة لموضوع شاب فقرى فهيكون فى البوست القادم

شاب فقرى :)

شاب فقرى يقول...

fL0weR-giRL
نورتى المدونة

وكل سنة وانتى طيبة

الحمد لله التنضيف دى من خبراتى الكتير :)

ممكن اغسل المواعين لو لزم الامر :p

وبالنسبة لموضوع الفقرى دا اكيد هكتب عنه قريب جداااا

لكى منى كل التحية :)

شاب فقرى :$

شاب فقرى يقول...

بيطرية ومش بايدى
نورتى المدونة يا دكتورة
كل سنة وإنتى طيبة وبألف خير
ومش بتيجى فى الوقت الضايع ولا حاجة

هبقى احجزلك اول تعليق :p
ولا يهمك

تعرفى انا لما نضفت أودتى
حركت حاجات ومسحت مكانها مكانش حد يقدر يفكر انها تتحرك من كتر ما هى تقيلة ورخمة

بس كنت بقول جملة واحدة ( إنته القوى يارب )

كل سنة وانتى بخير وإلى الله أقرب

شاب فقرى :)

Unknown يقول...

كل سنة وانت طيب على فكرة...

اممممممممم البوست بتاعك ادانى امل معرفش ليه...انا بحب اشوف الناس سعدا بحس ان فى امل انا كمان ابقى سعيدة..

الحمد لله.....اممممممم ممكن يكونوا اللى حواليك وحشين وبرضو يبقى عندك امل؟؟ او يعنى تكتفى بشوية الناس اللى حلوين وتنفض للجزم..

كلام مش مفهوم عارفة بس عموما كل سنة وانت زى الفل...بجد من قلبى

شاب فقرى يقول...

منورة يا دكتور انجى

وكل سنة وانتى طيبة

كلامك مفهوم وكل حاجة

بس مينفعش انفض لشوية واكلم الشوية الباقيين

الواحد لا يختار من يعيش معهم
وكمان مبيختارش اللى مبيقدرش يعيش من غيرهم

وانا سعيد جدا ان البوست إداكى أمل

وإن إنتى مبسوطة

ونورتى المدونة

ويارب دايما بخير ... وزى الفل

شاب فقرى :)

VÖltaa يقول...

ازيك ياكبير

تعرف انت اديتنى انا امل
الا صحيح انت شغال ايه
لاحسن انت جيت على زكريات ليا ايام ماكنت بتعلم الهاكر

يااه ايام

كان عندى سؤال كده
انا تجارة انجليزى
بس نفسى ابقى مبرمج وكراكر
ونفسى اخد الشهادات اللى قلت عليها فى البوست دى
ينفع ؟

فراشة يقول...

ماشاء الله عليك بجد فرحت بيك قوي

عشان الشهادات الجميلة اللى خدتها وهتاخدها

بتفكرني بقريبي زيك كدا طموح ومتحمس لشغله دا وبيحبه قوي

ودعواتك انا كمان نفسي آخد شهادة بس هي مش كبيرة ولا مهمه هي دبلومة ف التربية النفسية